Passage 1.3

तद्योगं च द्विधा विद्धि पूर्वोत्तरविभागतः ।

पूर्वं तु तारकं विद्यादमनस्कं तदुत्तरमिति ।

तारकं द्विविधम् । मूर्तितारकममूर्तितारकमिति ।

यदिन्द्रियान्तं तन्मूर्तितारकम् । यद्भ्रूयुगातीतं

तदमूर्तितारकमिति । उभयमपि मनोयुक्तमभ्यसेत् ।

मनोयुक्तान्तरदृष्टिस्तारकप्रकाशाय भवति ।

भ्रूयुगमध्यबिले तेजस आविर्भावः । एतत्पूर्वतारकम् ।

उत्तरं त्वमनस्कम् । तालुमूलोर्ध्वभागे महाज्योतिर्विद्यते ।

तद्दर्शनादणिमादिसिद्धिः । लक्ष्येऽन्तर्बाह्यायां

दृष्टौ निमेषोन्मेषवर्जितायां च इयं शाम्भवी

मुद्रा भवति । सर्वतन्त्रेषु गोप्यमहाविद्या भवति ।

तज्ज्ञानेन संसारनिवृत्तिः । तत्पूजनं मोक्षफलदम् ।

अन्तर्लक्ष्यं जलज्योतिःस्वरूपं भवति । महर्षिवेद्यं

अन्तर्बाह्येन्द्रियैरदृश्यम् ॥ ३॥

tadyogaṃ ca dvidhā viddhi pūrvottaravibhāgataḥ | pūrvaṃ tu tārakaṃ vidyādamanaskaṃ taduttaramiti | tārakaṃ dvividham | mūrtitārakamamūrtitārakamiti | yadindriyāntaṃ tanmūrtitārakam | yadbhrūyugātītaṃ tadamūrtitārakamiti | ubhayamapi manoyuktamabhyaset | manoyuktāntaradṛṣṭistārakaprakāśāya bhavati | bhrūyugamadhyabile tejasa āvirbhāvaḥ | etatpūrvatārakam | uttaraṃ tvamanaskam | tālumūlordhvabhāge mahājyotirvidyate | taddarśanādaṇimādisiddhiḥ | lakṣye'ntarbāhyāyāṃ dṛṣṭau nimeṣonmeṣavarjitāyāṃ ca iyaṃ śāmbhavī mudrā bhavati | sarvatantreṣu gopyamahāvidyā bhavati | tajjñānena saṃsāranivṛttiḥ | tatpūjanaṃ mokṣaphaladam | antarlakṣyaṃ jalajyotiḥsvarūpaṃ bhavati | maharṣivedyaṃ antarbāhyendriyairadṛśyam || 3||